தமிழ் மொழி கவிதைகள்

என் கவிதை  

உள்ளமதில் வெள்ளமென

எழுந்திட்ட எண்ணங்களை

கருத்தாய்ந்து பகுத்தாய்ந்து

பாரெல்லாம் வழங்கிடவே

அன்னைத்தமிழ் அருள்வேண்டி

தமிழ்புலவன் நடைநின்று

தெளிமிகு சிறப்புடனே

வடித்திடவே முனைந்திட்டேன்

சொல்லொன்று தீட்டிடவே

ஓராயிரம் நொடிபொழுது

செலவழித்து இரவெல்லாம்

விழிகளை சேகரித்து

நாளெல்லாம் மூச்சுவொன்றே

உணவாக சுவாசித்து

தீட்டிட்ட தீந்தமிழ் திரவியம்

நான் வரைந்திட்ட கவி ஓவியம்

தமிழ் மொழி  

இறைவனோடும் இவ்விகத்தோடும்

இணைந்து தோன்றிட்டு

காலங்களை கடந்து வாழ்ந்திடும்

பண்பட்ட பழமை மொழி

அடர்காடுகளில் கரடுமலைகளில்

அலைந்து திரிந்திட்ட முதல் மனிதன்

இயற்கையோடு இணைந்து உறவாடி

வடித்திட்ட இயற்கை மொழி

சொல்யொன்றை உயிர் ஓவியமாய்

யுகமதில் வாழும் காவியமாய்

சிந்தனையை கடைந்து படைத்து

தீட்டிட்ட தொன்மை மொழி

தானே விதையுண்டு விருச்சகமாய்

வேரோடி ஆலமரமாய் தழைத்திட்டு

இலக்கண இலக்கியம் வளம் கொளுத்து

செழுத்திட்ட செம்மொழி

தெலுகு கன்னடம் துளு மலையாளம்

என இருபத்தொன்பது புதுமொழி விழுதுகள்

தன்னிலே ஈன்றெடுத்து பிறமொழி கலவாது

உயர்தனி தமிழ் தாய்மை மொழி

தமிழ் வேந்தர்களும் மாந்தர்களும்

சங்கங்கள் நிறுவிட சான்றோர்கள்

இயிற்றிட்ட வாழ்வியியல் நூற்களால்

கல்வி சிறந்திட்ட நெறியியல் மொழி

திருநூற்கள் குறளும் நாலடியும் சிலம்பும்

தெய்வ புலவன் திருவள்ளுவரையும்

தேன்கவி புலவன் கம்பனையும்

வரமாக பெற்றிட்ட சிறப்பு மொழி

தமிழகம் ஈழம் தன் தாயகத்தில்

மலேயா சிங்கை மொரிசு பிஜு

என புலம்பெயர்ந்த பன்னாட்டில்

தலைநிமிர்ந்து புகழ்சேர் உலக மொழி

கணிணியுகத்தில் தடம் பதித்து

அறிவியியல் மொழியாய் பரிணாமித்து

இணையத்திலும் புதுமை புரட்சி செய்து

நாளும் உயரும் நம் தாய் தமிழ் மொழி

தமிழ் மாதங்கள்  

தை பிறந்தால் வழி பிறக்கும்

தமிழர் வாழ்வில் வளம் கொழிக்கும்

மாசியில் மங்களம் சூடிடும்

புது வரவுகள் பொங்கிடும்

பங்குனியில் ஊரெங்கும் திருவிழா

தெருவெங்கும் தேரோட்டம்

சித்திரை வெயிலை இளநீர் பதநீர் தணிக்க

சித்திரை விழாக்கள் கோலாகலமாகும்

வைகாசியில் வைபோகம்

மணமாலைகள் சூடிட மங்களமாகிடும்

ஆனியில் உச்சிவெயில் தணியும்

ஊரெல்லாம் மெல்லிய தென்றல் வீசும்

ஆடியில் ஆறுகளில் புதுப்புனல் பொங்கிடும்

உழவு ஆடிப்பட்டம் தேடி விதைக்கும்

ஆவணி வந்ததும் நல்வரவும் வந்திடும்

தடைகள் நீங்கி சுபகாரியங்கள் நிகழ்ந்திடும்

புரட்டாசி விரதம் மாந்தரின்

மனதை பக்குவபடுத்த உதவிடும்

ஐப்பசி மழை அடை மழை

ஊரெல்லாம் தீவுபோல் காட்சியளிக்கும்

கார்த்திகையில் இல்லம்தோரும் அகல்விளக்கு

ஒளிரிந்திட நமைகள் குடி புகுந்திடும்

மார்கழி குளிரில் வாசல்களில் கோலங்களும்

வயல்களில் வசந்தங்களும் பூத்திருக்கும்

திருக்குறள்  

இருவரிகளில் - ஓர்

இலக்கிய இமயம்

அறம் பொருள் இன்பம் - என

வகுத்த வாழ்வியல் காவியம்

இவ்விகம் ஒன்றே - இங்கே

வாழ்ந்திடும் யாவரும் ஒன்றே

நீதியும் ஒன்றென என்றே போற்றிடும்

உலக பொதுமறை இதுவன்றோ

பொருள் ஈட்டி வாழ் - இல்லாருக்கு

ஈகை செய்திடுக இல்லறம் துறவறம்

பொருள்படவாழ்ந்திடுக - என

உண்மைதனை சாற்றிடும் அற நூல்

கற்றலில் மானிடர் உயர்ந்திடுக - நீவிர்

கல்லாமை கயமை கலைந்திடுக

முயற்சிதனில் என்றும் வென்றிடுக - என்றே

கல்வி பாடும் திருநூல் திருக்குறள்

வான் புகழ் வள்ளுவன் வடித்தெடுத்த

தேன்தமிழ் தெவிட்டாத திரவியம் - காலம்

வாழும் வரை மாந்தருக்கு வழிகாட்டும் - என்றுமே

இப்புகழ்நூல் பூமிதனில் நின்றிடும்

தமிழர் திருநாள்

தைத்திங்கள் முதல் நாள் பொங்கல் பெருநாள் - அதுவே

தரணி வாழ் தமிழரின் திருநாள்

அறுவடையின் ஆண்டவரை வணங்கி

உழைத்திட்ட உழவர் பெருமக்களை வாழ்த்தி

வளமைதனை நல்கிடும் இயற்கையை போற்றி

புத்தரிசியில் சர்க்கரை பால் பொங்கலிட்டு

தித்திக்கும் தேன்கரும்பு சுவைத்தே

மகிழ்ச்சி கூவலிடுவோம் பொங்கலோ பொங்கல்!

சாதி சமய எல்லைகளை கடந்து - தமிழ்

இரத்தங்கள் என்ற உணர்வில் கலந்து

இனம் காக்க இன்பத்தமிழ் காக்க

இவ்விகம் வாழ் தமிழர் நலன் காக்க

இதயங்கள் இணைய தோள்கொடுப்போம்

பாரெங்கும் பசுந்தமிழை பறைசாற்றி

நாளும் நற்றமிழ் வளர்த்து - நல்லவர்

தமிழரே என்ற பண்பினை சாற்றிடிட்டு

மகிழ்ச்சி கூவலிடுவோம் பொங்கலோ பொங்கல்!

உண்மை சொல்லெடுத்து நாவிற்கு வலிமைதந்து

ஆற்றல்மிகு திறமைதனில் நம்பிக்கைகொண்டு

நாளும் பொழுதும் முயற்சியில் வளர்ச்சிக்கண்டு

உழைப்பின் உயர்வில் முழுநிறைவுக்கண்டு

வானம்வரை எழும்பட்டும் தமிழ் சமூகம்

அவர்தம் புகழ் திக்கட்டும் ஒலிக்கட்டும்

வாழட்டும் தமிழர்யென்று வையகம் வாழ்த்திட

மகிழ்ச்சி கூவலிடுவோம் பொங்கலோ பொங்கல்!

அருந்தமிழ் அருவியில் ஒரு கவிகுளியல்

கவிபாடும் தோழமை நெஞ்சங்களே

தமிழ் புகழ்பாடும் என் அன்பு சொந்தங்களே

தமிழ் மன்றத்தில் இணைந்த இதயங்களே

புதிய சிந்தனை வடித்து - அதை

தேன்தமிழில் தெவிட்டாமல் படைத்தது

பாரெங்கும் வழங்கிடும் வள்ளல்களே

அன்பு அமைதி மகிழ்ச்சியில் புத்துலகம்

அமைத்திட எழுத்தில் ஏற்றம் தரும் - என்

அன்பு நண்பர்களே கவிஞர் பெருமக்களே

உங்களில் ஒருவனாய் அடியேனும் இணைந்து

தமிழ் பணியாற்றிட தமிழ் கவி பாடிட

புது கவிஞனாய் பரிணாமம் எடுக்க

ஆயிரம் ஆசைகள் சிறகடிக்க - உங்கள் ஆ. தைனிஸ்

பாச உறவுகளின் கவி கூடுகள் தேடி வந்துள்ளேன்

கவி மழையில் நனைந்து அருந்தமிழ் அருவியாய் கொட்டி

பசுமை போர்த்திய ஆறாய் கவிச்சிந்தனை விரிந்து

ஆழ்கடல் செந்தமிழில் மூழ்கி நற்கவி முத்தெடுத்து

முத்தமிழ் சாற்றிடும் தாய்த்தமிழுக்கு முடிசூடிட

விரும்பி மகிழ்ந்து விழைகின்றேன் - என்றும்

தமிழ்புகழ் பாடிடவே துடிக்கின்றேன்.